សន្និសីទស្រាវជ្រាវថ្នាក់ជាតិលើកទី១ ឆ្នាំ២០២៦ ក្រោមប្រធានបទ «គ្រូបង្រៀន និងបញ្ញាសិប្បនិមិ្មតក្នុងបរិវត្តកម្មឌីជីថល» 

សន្និសីទស្រាវជ្រាវថ្នាក់ជាតិលើកទី១ ឆ្នាំ២០២៦ ក្រោមប្រធានបទ «គ្រូបង្រៀន និងបញ្ញាសិប្បនិម្មិតក្នុងបរិវត្តកម្មឌីជីថល»

រាជធានីភ្នំពេញ៖ នារសៀលថ្ងៃទី១៥ ខែមិថុនា ឆ្នាំ២០២៦ នៅវិទ្យាស្ថានជាតិអប់រំ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញជាអធិបតីក្នុងសន្និសីទស្រាវជ្រាវថ្នាក់ជាតិលើកទី១ ឆ្នាំ២០២៦ ក្រោមប្រធានបទ «គ្រូបង្រៀន និងបញ្ញាសិប្បនិម្មិតក្នុងបរិវត្តកម្មឌីជីថល» ដោយមានការចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា លោកបណ្ឌិត Bob Spries សាស្ត្រាចារ្យមកពីសាកលវិទ្យាល័យ Richmond សហរដ្ឋអាមេរិក វាគ្មិនជាតិ-អន្តរជាតិ លោក លោកស្រី គណៈគ្រប់គ្រង គ្រូឧទ្ទេស អ្នកស្រាវជ្រាវ បុគ្គលិកអប់រំ និស្សិត គរុនិស្សិត និងសិស្សានុសិស្សជាច្រើនរូប។

សូមជម្រាបថា សន្និសីទស្រាវជ្រាវថ្នាក់ជាតិលើកទី១នេះ ត្រូវបានរៀបចំឡើងរយៈពេល ៣ថ្ងៃ គឺចាប់ពីថ្ងៃទី ១៥ ដល់ថ្ងៃទី១៧ ខែមិថុនា ឆ្នាំ២០២៦ ក្រោមប្រធានបទ «គ្រូបង្រៀន និងបញ្ញាសិប្បនិម្មិតក្នុងបរិវត្តកម្មឌីជីថល» ដោយធ្វើឡើងជាពីរភាសា គឺភាសាខ្មែរ និងភាសាអង់គ្លេស ក្នុងគោលបំណងលើកកម្ពស់ការស្រាវជ្រាវ ការចែករំលែកចំណេះដឹងនិងបទពិសោធ និងការស្តាប់អំពីគំនិតថ្មីៗ ចេញពីលទ្ធផលស្រាវជ្រាវ និងវាគ្មិនកិត្តិយសនានា ព្រមទាំងពិភាក្សាអំពីបញ្ហាប្រឈមផ្សេងៗ ដែលទាក់ទងនឹងវិជ្ជាជីវៈគ្រូបង្រៀន និងការអប់រំ។ សម្រាប់សន្និសីទស្រាវជ្រាវថ្នាក់ជាតិលើកទី១ ឆ្នាំ២០២៦ នេះ អ្នកសិក្សាស្រាវជ្រាវ ចូលរួមធ្វើបទបង្ហាញមាន ចំនួន ៣១ប្រធានបទ និងកិច្ចពិភាក្សាតុមូលចំនួន ២ ប្រធានបទ ដែលមានសមាសភាពចូលរួមមកពីអ្នកសិក្សាស្រាវជ្រាវ តំណាងសាកលវិទ្យាល័យRichmond សហរដ្ឋអាមេរិក គ្រូបង្រៀនមធ្យមសិក្សា គ្រូឧទ្ទេស បុគ្គលិកអប់រំ និស្សិតថ្នាក់បណ្ឌិត និងអតីតនិស្សិតនៅវិទ្យាស្ថានជាតិអប់រំ ព្រមទាំងអ្នកសិក្សាស្រាវជ្រាវមកពីគ្រឹះស្ថានអប់រំនានាផងដែរ។

មានប្រសាសន៍ក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី កោតសរសើរ និងវាយតម្លៃខ្ពស់ចំពោះវិទ្យាស្ថានជាតិអប់រំ គណៈកម្មការរៀបចំសន្និសីទ ដៃគូអភិវឌ្ឍន៍ អ្នកស្រាវជ្រាវ គ្រូបង្រៀន និងវាគ្មិនទាំងអស់ ដែលបានខិតខំរៀបចំព្រឹត្តិការណ៍សិក្សាស្រាវជ្រាវដ៏មានសារៈសំខាន់នេះឡើង ដោយសន្និសីទនេះ មិនត្រឹមតែជាវេទិកាសម្រាប់បង្ហាញលទ្ធផលស្រាវជ្រាវប៉ុណ្ណោះទេថែមទាំងជាកន្លែង សម្រាប់ការពិភាក្សា ការផ្លាស់ប្តូរចំណេះដឹង ការបង្កើតបណ្តាញសហការ និងការលើកកម្ពស់វប្បធម៌ស្រាវជ្រាវក្នុងវិស័យអប់រំនៅកម្ពុជាផងដែរ។ ទន្ទឹមនឹងនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានលើកឡើងថា ក្នុងបរិបទនៃបដិវត្តន៍ឧស្សាហកម្ម ៤.០ និងបរិវត្តកម្មឌីជីថល បញ្ញាសិប្បនិម្មិត (AI) បានក្លាយជាបច្ចេកវិទ្យាយុទ្ធសាស្ត្រដ៏មានសារៈសំខាន់ក្នុងការលើកកម្ពស់គុណភាពរៀននិងបង្រៀន ប៉ុន្តែវានៅតែមិនទាន់អាចជំនួសតួនាទីស្នូលរបស់គ្រូបង្រៀនបានឡើយ។ ក្នុងន័យនេះ យើងត្រូវចេះទាញយកចំណុចខ្លាំងរបស់ AI មកប្រើប្រាស់ជាឧបករណ៍ជំនួយការងារ ប្រកបដោយ «សីលធម៌ និងទំនួលខុសត្រូវ» ដើម្បីបង្កើនការគិតវិភាគ និងច្នៃប្រឌិត ដោយមិនប៉ះពាល់ដល់ឯករាជ្យភាពនៃការគិតរបស់សិស្សឡើយ។ ជាមួយគ្នានេះ ក្រសួងអប់រំ យុវជន និងកីឡា មានចក្ខុវិស័យវែងឆ្ងាយក្នុងការធ្វើទំនើបកម្មប្រព័ន្ធអប់រំ តាមរយៈការកែទម្រង់កម្មវិធីសិក្សា កែលម្អសៀវភៅសិក្សាគោល និងផ្លាស់ប្តូរវិធីសាស្ត្របណ្តុះបណ្តាលគ្រូ ដើម្បីឆ្លើយតបទៅនឹងការវិវត្តយ៉ាងរហ័សនៃសង្គម-សេដ្ឋកិច្ចឌីជីថល ព្រមទាំងជួយគាំទ្រដល់ការធ្វើពិពិធកម្មសេដ្ឋកិច្ចជាតិ ដូចជាវិស័យកសិកម្មឆ្លាតវៃ (Smart Agriculture) ជាដើម។

បន្ថែមលើនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានផ្សារភ្ជាប់ការប្រើប្រាស់បច្ចេកវិទ្យា ទៅនឹងការលើកកម្ពស់លទ្ធផលសិក្សារបស់សិស្ស ដែលឆ្លុះបញ្ចាំងតាមរយៈការវាយតម្លៃកម្រិតតំបន់ និងអន្តរជាតិ រួមមានតេស្ត SEA-PLM និង PISA។ ក្នុងន័យនេះ ខណៈពេលដែលកម្រិតបឋមសិក្សាមាន «កញ្ចប់អំណានដំបូង និងគណិតវិទ្យាដំបូង» ក្នុងការជួយគាំទ្រលើកិច្ចការនេះ សម្រាប់កម្រិតមធ្យមសិក្សា គឺទាមទារឱ្យមានការកែលម្អបន្ថែម និងប្រើប្រាស់វិធីសាស្ត្របង្រៀនបែបថ្មីៗ ឱ្យកាន់តែមានប្រសិទ្ធភាព សំដៅជំរុញឱ្យពិន្ទុតេស្ត PISA មានការកើនឡើង។ ក្នុងឱកាសនេះដែរ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានជំរុញឱ្យគណៈគ្រប់គ្រង និងគ្រប់ភាគីពាក់ព័ន្ធ រួមគ្នាពិនិត្យមើលកម្មវិធីសិក្សា ព្រមទាំងបញ្ជ្រាបបច្ចេកវិទ្យាឌីជីថល និងសូចនាករតេស្ត SEA-PLM និង PISA ទៅក្នុងការគ្រប់គ្រងសាលារៀន និងថ្នាក់រៀន ដើម្បីបន្តជំរុញការធ្វើកំណែទម្រង់សាលារៀន ក្នុងក្របខ័ណ្ឌ “សាលារៀនគំរូ” ព្រមទាំងការបន្តធ្វើកំណែទម្រង់វិស័យឧត្តមសិក្សា ឱ្យស្របតាមទិសដៅនៃយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល សំដៅកសាងមូលធនមនុស្សកម្ពុជាឱ្យមានភាពធន់ វៃឆ្លាត និងមានសមត្ថភាពប្រកួតប្រជែងខ្ពស់៕